今日Lunch食咩好?觀塘工業區試食好西分享

今日Lunch食咩好?觀塘工業區試食好西分享

返工最期待又煩惱既事莫過於今日食咩,岩岩先食完個早餐,d野都未落哂格,就開始諗今日lunch食咩好😂又唔想成日食黎食去都係個啲,上兩個星期試左三間新野,三間都唔伏仲好ok喎,寫返個blog post同大家開心share下先😁


拿!先小人後君子,相就唔多既,話哂同同事成班出黎食飯,淨係掛住影相會好掃興,所以我都係影左三、四張咁就收左手😵

米線工房
有同事係米線控,附近既羊肉米線或者要去到康寧道既三哥譚仔都係我地既例牌(但最近真係熱到唔想行),個日唔知食咩好就行行下上左黎電訊廣場,見到呢間新野諗住試下,但冇位要等所以就去左食第二樣,諗住下次晏d冇咁多人再上黎食,我地足足上左黎三/四日先食到😓早d十二點幾上黎又試過,遲d兩點幾上黎都試過,但次次都係排哂長龍,米線控同事死心不識,呢日終於試到啦(拍手)~~

睇返d相先知原來我冇影到米線本人😅有機會再補返。呢個係menu本人,揀左小小辣試下先(我係唔食得辣既人,但最近練緊食辣),係OK既我接受到👌🏼說話佢配料係有埋肉碎,呢樣我大加分,除左蔥同肉碎其他都走哂。

原來佢仲有小食,搵日試下先。温馨提示:2點後送凍熱飲💁🏻

相馬日式火鍋 Soma Shabu Shabu
呢間野係正米線工房隔黎,就係因為食唔到米線工房,又要再諗食咩,我見到隔黎呢間野就講笑話不如打邊爐啦。入去姐姐仔比左張既menu比我地,睇睇下最平都係$58,其實都唔算貴。一開始都覺得lunch打邊爐會唔會太heavy,但食落又ok喎,狂食菜/金菇/豆腐/丸,我地食完仲決定要再ENCORE!!😋😋

$58有加一、45分鐘、有一碟牛、其他任拎

落左order,等湯底到時緊係去拎野食啦,都唔小選擇

調味料都可以自己黎

野飲一罐$5,任飲全枱每人加$10

一人一鍋好正呀,兩個蕃茄湯,三個豚肉湯,仲有其他湯底揀既,好似總共有5個定6個湯底揀

火星料理 Mars Menu
同事話去食”火星料理”,聽個名就覺得好伏咁,問清楚先知呢原來係食韓國料理既,細細間裝修正常簡單,唔係特別新個隻,有種味道,韓國既味道哈哈。

係工廈入面既,門口大大隻字寫住火星料理

小菜,好多款呀,不過可能因為我地一行十人所以先咁多小菜,唔知有冇得免費加既呢

Menu有前後兩頁,都算幾多選擇,價錢$60~$80算中上


37號壽司拼雜菜炒粉絲,男同事話佢唔夠食😅

同事既1號招牌辣汁豬肉雜菜拌飯,同我個個好似

呢個我既,7號照燒汁牛肉雜菜拌飯,正皮

唔知係我太肚餓定係佢真係好食,我一粒米都冇剩到😊幫人洗埋碗咁濟

三間講完啦,我之前都講過,我食野係小朋友口味又冇要求,所以我個人覺得冇伏呀。你地想食就搵日去試下啦🏃🏻🏃🏻🏃🏻